mtuhumiwa wa mauaji auawa na wananchi makete

Na Edwin Moshi, Makete

Katika hali isiyo ya kawaida wananchi wanaodhaniwa kuwa ni wa kijiji cha Usagatikwa kata ya Tandala wilaya ya Makete mkoani Njombe wameamua kuchukua sheria mkononi kwa kumpiga hadi kumuua Bw. Festo Sigala(44) kwa tuhuma za mauaji

Tukio hilo limetokea Septemba 29 mwaka huu katika kijiji cha Tandala wilayani hapo, baada ya wananchi hao kumfuata mtuhumiwa huyo kwa lengo la kumdhuru kutokana na tuhuma za mauaji ya mwananmke aliyetambulika kwa jina la Furaha Datovu Sanga(37)

Akithibitisha hilo ofisini kwake Mkuu wa polisi(OCD) wilaya ya Makete Alfred Kasonde (Pichani) amesema Bw. Nesco Thobias Chaula mkazi wa kijiji cha Usagatikwa aligundua kupatikana kwa mwili wa marehemu Furaha ambaye aliripotiwa kupotea tangu Mei 15 mwaka huu ambapo alitafutwa bila mafanikio ambapo mwili huo wa marehemu ulikutwa ndani ya choo cha shimo kinachomilikiwa na Festo Sigala ambaye kwa sasa ni marehemu

 

Amesema baada ya hapo wananchi waliamua kumsaka mtuhumiwa huyo ambapo walimkuta eneo la stendi ya mabasi katika kijiji jirani cha Tandala wakati akijaribu kutoroka baada ya kupata taarifa kuwa wamegundua kama alifanya mauaji, na wakaanza kumpa kipigo

"Walimkuta stendi huyo mtuhumiwa akiwa anataka kutoroka baada ya kujua kuwa anatuhumiwa kwa mauaji na mwili wa marehemu ulikutwa kwenye choo chake na wakaanza kumpiga kwa mawe, fimbo wakati alipotaka kutoroka eneo hilo" alisema Kasonde

Kufuatia kipigo cha wananchi hao kuwa kikali, mtuhumiwa huyo aliamua kutimua mbio kuelekea kituo cha polisi Tandala kwa lengo la kujisalimisha, lakini wananchi hao waliendelea kumfukuza na wakafanikiwa kumzingira na kuendelea kumshambulia kwa kipigo hasa maeneo ya kichwani amapo ubongo na damu vilimwagika kwa vingi hadi alipofariki dunia kabla hajafika kwenye kituo cha polisi

Amesema kutokana na wingi wa wananchi hao walioamua kujichukulia sheria mkononi, polisi waliokuwa kazini katika kituo hicho walizidiwa nguvu na kundi hilo la watu hivyo kushindwa kumnusuru mtuhumiwa huyo asiuawe kwani nguvu ya wananchi ilikuwa ni kubwa

 

hata hivyo baadhi ya mashuhuda wa tukio hilo wamedai kuwa marehemu huyo aliuawa akiwa ndani ya kituo hicho cha Polisi baada ya wananchi kuwazidi nguvu polisi na kuvinja chumba alichokuwepo marehemu, lakini suala hilo limekanushwa na OCD Kasonde na kusema kuwa kituo hicho kipo salama na wala marehemu hakuuawa kwenye kituo cha polisi

"Hakuna ukweli wowote wa taarifa kuwa ameuawa akiwa lokapu ya kituo cha polisi Tandala, hakuna kituo kilichovunjwa na badala yake wananchi wenye hasira kali ndio waliomuua wakati akikimbilia polisi kunusuru maisha yake" alisema OCD Kasonde

Katika hatua nyingine ameiomba jamii kuacha tabia ya kujichukulia sheria mkononi kwani ni kosa kisheria na badala yake wakimkamata mtuhumiwa wanatakiwa kumfikisha polisi ili sheria ichukuliwe

hadi sasa hakuna anayeshikiliwa kuhusiana na mauaji hayo na uchunguzi bado unaendelea